नेपालगञ्ज, कोभिड १९ परिक्षणकोलागि गर्दै आएको पीसिआर टेस्ट सर्वसाधारणमा रिपोर्ट नेगेटिभ आएपनि पोजेटिभ बनाउँदै आएको आरोपमा भेरी अस्पतालबाट तीन जना कर्मचारीलाई प्रहरीले पक्राउ गरेको छ ।
जिल्ला प्रहरी कार्यालय बाँकेबाट खटिएको प्रहरी टोलीले बुधबार दिउँसो २ बजे अस्पतालमा छापा मारी नेगेटिभ पीसिआर रिर्पोटलाई पोजेटिभ बनाउन संलग्न रहेको आशंकामा अस्पतालमा कार्यरत तीन कार्यालय सहयोगी सुरक्षा गार्डलाई पक्राउ गरेको छ ।
जिल्ला प्रहरी कार्यालय बाँकेका अनुसार पक्राउ पर्नेमा सुरक्षा गार्ड बद्री खनाल, वासुदेव जोशी र विवेक अधिकारी रहेका छन् ।
उनीहरुमाथि अनुसन्धान सुरु गरिएको बाँकेका प्रहरी प्रमुख एसपी ओमबहादुर रानाले जानकारी दिएका छन् । बीमा भुक्तानीका लागि नेगेटिभ रिपोर्ट मिलेमतोमा पोजेटिभ बनाएको प्रहरीको आशंका रहेको छ ।
