समाचार एजेन्सी
पेटको सन्तान छोरी रहेको आशंका गर्दै भारत उत्तर प्रदेशमा एक गर्भवती महिलाको पेट उनकै श्रीमानले हँसियाले चिरिदिएका छन् । पेट चिरिएकी महिलाको अवस्था चिन्ताजनक रहेको संचार माध्ययमहरुले बताएका छन् ।
पाँच वटी छोरीको जन्म दिएकी पत्नीको गर्भमा छैठौं सन्तान फेरि पनि छोरी नै हो कि भन्ने आशंकाले उनले गर्भवती पत्नीको पेट हँसियाले चिरिदिएको समाचारमा उल्लेख गरिएको छ ।
उत्तर प्रदेश बदायूं जिल्लाका पन्नालाललाई धारिलो हतियारले आफ्नी पत्नीको पेट चिरेको आरोपमा प्रहरीले गिरफ्तार गरेको छ । गम्भीर अवस्थाकी गर्भवती महिला अनीताको दिल्लीको एक अस्पतालमा उपचार भइरहेको बताइएको छ ।
छोरा जन्माउने आशा गर्दा गर्दा पाँच वटी छोरी जन्माइसकेकी अनीताको पेटमा रहेको बच्चा छोरा हो वा छोरी भन्ने पत्ता लगाउन पन्नालालले हँसियाले पेट चिरेको श्रीमती अनिताकी बहिनीले संचारकर्मीहरुलाई बताएकी छिन् ।
आफ्नो छैठौं सन्तान पनि छोरी नहोस् भन्ने चाहना पन्नालालमा रहेको पनि बीबीसीको समाचारमा उल्लेख छ ।