एजेन्सी– ‘कमेडी नाइट्स विथ कपिल’बाट चर्चामा आएका ३४ वर्षीय कपिल शर्माले बलिउडमा नयाँ चरणको सुरुआत गरेका छन् । अब्बास मस्तान निर्देशित चलचित्र ‘किस किसको प्यार करूँ’ मा कपिलले एक होइन, तीन तीनजना सुन्दरीसँग रोमान्स गरेका छन् ।
तिनै सुन्दरीसँगको रोमान्सले कपिललाई टेलिभिजनबाट टाढा पु¥याउने त होइन भन्ने आशंका पनि उब्जिएको छ । फिल्ममा काम गर्ने क्रममा एउटा पुरानो समस्याले निरन्तरता पाएको उनले बनाए । उनी जतिबेला टिभीमा ‘कमेडी सर्कस’ मा काम गर्थे, हत्केलाभरि डाइलग लेख्थे । उनी भन्छन्, ‘संवाद सम्झन अहिले पनि मलाई समस्या पर्छ, पुरानो बानी अझै छुटेन ।’
उनको बुझाइमा फिचर फिल्ममा फिल्मको संवाद भुले पनि खासै फरक पर्दैन तर टिभी र लाइभ सोमा निकै अप्ठ्यारो हुन्छ । कमेडियनबाट हिरो हुन त्यति सजिलो छैन भन्नेमा उनी सचेत छन् । किनकि, बलिउडले प्रायः हास्य कलाकारलाई हिरोको छेउमा उभ्याउँछ मात्रै । कपिललाई लागेको छ । ‘मलाई पनि पछि त्यसै गर्नेछन्, निर्माताहरूले ।’
कपिल शाहरुख खानलाई आफ्नो आदर्श पात्र मान्छन् । शाहरुखमा धेरै गुण देखेका कपिलले आफैं पनि शाहरुखसँग केही कुरा सिक्ने योजनामा छन् । उनको बुझाइमा क्षमता हुने कलाकारका लागि बलिउड सम्भावनाको खानी हो ।
उनी भन्छन्, ‘बलिउडमा आफ्नो ठाउँ बनाउन एकदमै मुस्किल हुन्छ । यदि क्षमता छ भने त्यति धेरै टाढाको कुरा पनि होइन ।’ कतिपय स्टार पुत्रपुत्री असफल भएकाप्रति इंगित गर्दै उनले भने, ‘क्षमता छैन भने बाआमाको सोर्स लगाएर पनि केही हुनेवाला छैन ।’